أنا : وعليكم السلام ورحمة الله وبركاته
وحشتينى يا رمضان قوى ، بقالك سنة غايب عننا
رمضان : اااااااه صباح الخير إزيك يا سهوره والله وانتى كمان
أنا : لسه فاكر اسمى ، ربنا يخليك ياارب
رمضان : المهم يا بكاشة ، ناويه على إيه السنة دى
أنا : أنا عارفه وفاكره كويس جدا انى السنة اللى فاتت قصرت فى حقك شويه
رمضان : احم احم .. شويه ؟؟؟ من أولها هنكدب
أنا : بس انته كنت عارف الظروف وحالتى النفسية كانت عامله ازاى
رمضان : بصى يا سهر مهما كان حجم المشاكل اللى عندك حطى فى اعتبارك الجمله دى
الله أكبر
فاهمه يا سهر
أنا : تعرف يا رمضان الجمله دى دايما بسمعها وبحسها أوقات أوقات
_ بس امبارح كنت مخنوقه قوى لدرجة عمرى ما وصلت لها فى حياتى
_ وقولت الله أكبر حسيت براحه كبيرة قوى
_ ربنا أكبر من كل حاجة ومن أى حد
رمضان : عينيه دمعت بس بقى قوللى هتعملى ايه
أنا : ان شاء الله هصلى التراويح فى مسجد النصر
برغم المسافه البعيدة بينا وبين المسجد
رمضان : ربنا يعينك يارب ، وبلاش تنسى الدعاء
أنا : اللهم أعنى على ذكرك وشكرك وحسن عبادتك
رمضان : عايزه حاجة بقى يا رغايه انا هروح أطمن على حد تانى
أنا : ربنا يخليك لنا يا أحلى شهر فى السنة ويعودك علينا بالخير
رمضان : السلام عليكم
أنا : وعليكم السلام
كل لحظة وأنت إلى الله أقرب
كل ثانيه وأنتم عن النار أبعد
كل ساعة وأنتم إلى الجنة أقرب
كل يوم وأنتم عن النار أبعد
كل شهر ..
كل سنة ....
وكل فميتو ثانيه وأنتم أحبابى وأصدقائى وأخواتى
ورمضان كريم عليكم يا أحلى ناس وأحلى صحبة خير
زماااااااااان وأنا صغيرة كان بيجى لى فانوس كل سنة إجبارى
دلوقتى حسرة عليا بشحت من اى حد فانوس
زمان رمضان ده كان إحساسى بيه مختلف عن دلوقتى
كانت فرحتى وانا صغيرة بالفانوس والجرى ورا المسحراتى
ولما ينادى إسمى ويقولى اصحى يا سهر واصحى يا ميدو
ميدو ده أخويا الوحيد
دلوقتى فرحتى برمضان لما بختم القران لما أصلى التراويح فى المسجد
بس وأنا صغيرة كنت بروح أصلى برضه
يادوب بنفطر أنا وعيال الشارع وجرى على المسجد عشان نلحق مكان
بس فى الخر برضه بنطرد اه والله الستات الكبار ربنا يسامحهم كانوا بيطردونا من المسجد
عشان كنا بنقول القران مع الامام عادى ايه المشكله يعنى
؟أنا فاكره زمان أنا وأخويا ميدو كنا بنروح نصلى المغرب فى المسجد قبل الفطار
ونقول لماما لو بكار جه خليه يستنى وبلاش تغرفى الأكل عشان ميبردش
ونروح نصلى وناخد معانا البلح عشان نوزع على الناس
كنا بنجيبه من مصروفنا ياااااااااااه
وبعد الصلاة أجرى أنا وميدو عشان نلحق ناكل اى حاجة
ولا كله كوم وبوجى وطمطم كوم يااااااااااه كنت بحبه جدا
وأكيد هتباعه السنة دى
أأقولكم على حاجة تتضحك رمضان اللى فات كان عندى 21 سنة
وكنت بقف فى البلكونة مع العيال ولاد خالى وخالتى عشان أأقول للمسحراتى
قول اصحى يا سهر
وأكيد النهارده هعمل كده برضه
هقوم بقى
هساعد مع ماما فى المطبخ
أعمل بلقمتى فى البيت ده هههههههههههههه
اه نسيت أأقول لكم منار صاحبة مدونة ( شباك موارب ) فى السعودية
والله البت دى وحشانى جدا
بس لما تجى يا منار هوريكى
المهم هتروح تعمل عمرة وهتشوف الكعبه
الكعبه يا جدعان الكعبه !!!
اللى عايز دعوة يقولها هى واخده معاها لستة دعوات معاها
بس انا عايزه ااقول حاجة لكل الناس اللى أعرفهم
لو كنت زعلت حد غصب عنى انا اسفه
لوكان حد زعلنى أنا مسامحة
سلام بقى
سهوررررررررررره
هناك 11 تعليقًا:
ازيك ياسهوره عامله ايه كل سنه وانتى طيبه
وجميل اوى الحوار مع رمضان واسلوبك جميل وربنا يعينا على العباده باذن الله
الله بجد حوار جميل قوى يا سهوره
كل سنه وانتى طيبه يا قمر وكل اسرتك بخير يا رب
رمضان مبارك
تحياتى
السلام عليكم
كل لحظة وأنت إلى الله أقرب كل ثانيه وأنتم عن النار أبعد كل ساعة وأنتم إلى الجنة أقرب كل يوم وأنتم عن النار أبعد
امين يارب العالمين
ربنا يتقبل
ويبلغنا رمضان اعوام واعوام باليمن والخير وبالركات
وانا مبسوطة جدا انى اتعرفت على مدونتك
لا تشتاق
كل سنة وانته طيب يا أحمد
ويارب السنة الجايه تكون فى أحسن حال
يارب
وميرسى على ذوقك
تحياتى
سهوره
pink dreams
وانتى طيبه يا حبيبة قلبى يارب يخليكى ليا
ورمضان مبارك عليكى وعلى كل اسرتك
وان شاء الله ربنا الجاى تكونى أقرب الى الله
وأسعد وأحسن
هتوحشينى جدا
تحياتى
سهوره
دموع القمر
كل سنة وانتى طيبة
وانا كمان سعيدة بزيارتك وان شاء الله نتواصل
ويارت تشرفينى تانى
واتمنى نكون أصدقاء
تحياتى لكى
سهوره
السلام عليكم
فكرة الحوار جميله
تسلم ايديكى يا سهورة
كل سنه وانتى طيبه يا حبيبتى
رمضان كريم
سهوره حبيبتى
كل سنه وانتى طيبه
وكل رمضان وانتى بخير
البوست حلو اوى وخاصة ذكرياتك
تسلمى
ومضان كريم
تحياتى
سهر
انا جييييييييييييييييت
نورت البيت
وحشااااااااااااااني
اخبارك ايه؟؟
انا كويسه الحمد الله جدا
واحسن مافي البوست انك بتعملي بلقمتك
السلام عليكم
كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه
وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم
وارزقنا العفاف والرضا - والمحبة واهدينا يا عظيم
وأعنا علي القيام والصيام والصلاة والارتقاءالي جنة الفردوس
واجعلها لنا ميراث خير وسعادة
واجعلنا من عتقاءك في هذا الشهر يا معطي يا وهاب
وارزقنا حلاوة القرآن و حسن تلاوته
وتدبر معانيه وفهم علي النحو الصحيح
ورطب ألسنتنا بذكرك يا الله
كل سنة وانت طيبة
ومتقصريش فى حق رمضان تانى عشان المرة الجاية هيشدك من ودانك
هههههههههههههههههههههه
جميل اوى الحوار بينك وبين رمضان
وفعلا الله اكبر من اى حد ومن اى حاجة
إرسال تعليق