طل من شباكك
يمكن يصادف نظرتك ضى
وبلاش تقول إنك قليل فى الحياة
حاول تعيش لحظة حياة بجد
حاول تكون إنسان بجد
ولحد إمتى تشيل همومك
وتقول مفيش زى فى الحزن حد
ياااااااااااااااااااه كل واحد مننا لما تحصل له مشكلة يحس خلاص إنها نهاية الحياة
والدنيا تسود وكل شويه يقول ليه هو مفيش اللى أنا اللهم لا اعتراض
ولو فكر الواحد مننا لما يحصل له أزمة يبص على الناس اللى حواليه
ويشوف مشاكلهم وحجمهما هيعرف قد إيه هو مكبر الموضوع
أنا شخصيا لما بيكون عندى مشكلة
زمان يعنى من حوالى أربع سنين تقريبا
كان لما يحصل أزمة أحس إنى خلاص انتهيت وأعيطت وأخبط فى الحيطة
وأكسر أى حاجه قدامى بس ان جيتم للحق بقول لاحول ولا قوة إلا بالله
إنما اليومين دول أو من سنتين تقريبا بقيت هادية جدا
أى أزمة أو أ مصيبه باخدها بصدر رحب وبسكت
وكل اللى بعمله إنى بستعيذ بالله من الشيطان الرجيم وأقول لا حول ولا قوة إلا بالله
مهما كان نوع المشكلة بكون هاديه جدا
ماما بتفسر ده ببرود يعنى أنا أزعق وأثور وأغضب ليه
هو يعنى غضبى ده هيرجع حاجه ده تفكيرى
هو يعنى لو ضغطى ارتفع زيها ل 230 هرتاح كده
لا طبعا
النهارده لما كنت قاعده أنا وأميرة برغى كالعادة وشفناه القمر
وبجد كان فى غاية الروعه النهارده
إمبارح كان كبير شويه وكل يوم يصغر يصغر
إكتشف حاجه مهمة
إن أى حاجه فى الدنيا بتتولد صغيرة وبتكبر
إنما الحاجه الوحيدة اللى بتتولد كبيرة وبتصغر هى الحزن
فعلا لما الحزن بسبب مشكلة ما بيدخل القلب بيقى كبير
وكل يوم بيقل وبيتلاشى ده عند الناس كلها
إنما أنا مقدرش أعيش من غير حزن
الغريب جدا إن كل اللى بيقرأ مدونتى بيفسر البوسات على حالتى المزاجية
لالالالالا أنا ساعات بكتب حاجات مفرحة وأنا فى غاية الحزن
وساعات العكس
الشمس هتطلع هروح أستناها بقى
سلام
طبعا هتقولوا لى سلمى على أميرة
حاضر
يوصل إن شاء الله
على فكره أميرة دى صديقتى الأنتيخ
ورغاية موت مثلى
او بصراحه انا اللى رغاية اكتر حبتين
هههههههههه
سلام بقى
ألحق الشمس وأحاول أسرق من نورها شويه أملا بيه حبارة قلمى
يمكن أكتب شعر
.............
..........
..
.
هناك 7 تعليقات:
وللمره الثانيه على التوالى
أ,ووووووووووووووووووووول تعليق
دا انا محظوظ بقى
طيب والله العظيم محظوظ
شوفتى بقى
جميل قوى قوى الكلام ده يا سهوره والله
كلام كله سليم ومظبوط جدا مائه بالمائه
فعلا الحزن هو الحاجه الوحيده اللى بتتولد كبيره وتصغر مع مرور الوقت
على فكره سلمى على أميره وقوليلها عمو علاء احتل المدونه وعمال ياخد أول تعليقات كل مره
ههههههههههههههههههه
صباح الفل وألحق الشمس بقى أنا كمان
سلالالالالالالالالالالالالالام
الله على الأمل لما يحيى القلوب(اسمحى لى ياأستاذةأستعين بصديق من كلامك الجميل)طل من شباكك يمكن يصادف نظرتك ضى ..وتشوف ربيع الحياةزهره فى قلبك ما له زى ..أبيض وأحمر وأصفر كمان.. بهجة بتعسد كل حى.فكرتينى بكلام عمنا صلاح جاهين وهو بيقول :إنشد يا قلبي غنوتك للجمال ..وارقص في صدري من اليمين للشمال .. ما هوش بعيد تفضل لبكره سعيد ..دا كل يوم فيه ألف ألف احتمال ..(خلاص مش راكب القطر لما أشوف مش هتكتبى فى إيه يمكن ألاقى حاجة أكتبها بعدإبداعاتك الجميلةدى )
(Y)(Y)(Y)(Y)(Y) في انتظار الشعر
كلامك المرة دي بدا يتغير ! :D
طب بما انى جاية متأخر
شوفتى الشمس ولا لسه ^_^
و سلامى لأمبرة ياستى و هى كمان ان شاء الله معزومة على حاجة معاك عندى ^_*
تعرفى انى متشابهة معاك فى موضوع الكتابة ده
يعنى مش شرط فعلا علشان بكتب حزن ابقى حزينة أو فرح ابقى سعيدة
يلا منتظرة الشعر
الشمس طلعت مرتين لحد الان على فكرة ((:
بس ليه بتحبى تعيشى فى الحزن ..؟
الحزن بيولد ابداع بس الانسان عشان يكمل محتاج لأمل لفرحة لضحكة من القلب للحظة يحس فيها انه سعيد
لما الحزن يتملك منك إفتكرى لحظة حلوة ضحكة من قلبك يوم قضيتيه مع ناس بتحبيهم
حاولى تستمتعى بالحاجات البسيطة الحلوة اللى بتحصل فى الحياة
عشان ساعتها هتقدر تتغلبى على روح الحزن
الحزن بيتولد فعلا كبير وبيقل وبيتلاشى وبيجى لحظات فرح وحزن جديد
عيشى لحظاتك السعيدة ومتهمليهاش عشان تقدرى تكونى قوية وتستحملى الحزن اللى طبيعى الوجه الاخر للحياة
تحياتى ,, روحى الحقى نور الشمس بقي :D
إرسال تعليق