نايمه الشوارع وعمر خيرت بيعزف وده كلام ..؟؟

النت فصل ومكننتش لاقيه حاجه أعملها .. والناس اللى ف البيت ناموا وبقيت لوحدى كالعاده حتى لو هم صاحيين برضه لوحدى .. قررت أشرب قهوة فطبعا إزاى القهوة من غير عمر خيرت .. شغلت الكمبيوتر بصوت عالى ودخلت المطبخ .. الناس دايما تول القهوة دى مزاج وأنا عندى القهوة وعمر خيرت حاجه واحده ، لما دخلت المطبخ المنور لانى تواضعت ونطفته النهارده والله كان واحشنى من السنه للسنه بتصعب عليا ماما بس كان منظره يشرح القلب والله ,,, افتكرت انى شربت النهارده قوى كتير حوالى خمس مرات فليت لبن فى التلاجه تقريبا بتاع الجيران اصل الست اللى صادنا بتجيب اللبن عشان القطط ولما بحطه ف تلاجتهم العيال بتشربه فقالت لماما انا هجيبه عندك دا بتاع القطط والله رحيمه الست دى

المهم حطيت القهوة على البوتاجاز وهديت عليها قوى عشان تستوى على نار هاديه " ده مسلسل على فكره " سيبت القهوة تسوى نفسها ووقفت ف البلكونه أسمع صمت الشارع كان مليان هدؤء بدرجه غريبه افتكرت أغنيه حنان ماضى

( ...نايمه الشوارع والبيوت

والخطوة بتشق السكوت

وحدى وذكرى حب ضايع

بيطل من شباك حزين... )

فعلا زى ما ماقالت حنان ماضى الشارع كان نايم .. كانت حالة صمته أشبه بالميت اللى بيشيعه جنازته ومفيش صوت .. لكن الاختلاف مابينى وبين حنان ماضى ان لا فى حب ضايع ولا ف شبابيك مفتوحه هى تقريبا كانت بتحب ابن الجيران .. لكن مش ابن الجيران بتاع لا ابن جيران بيشرب لبن القطط

الليلادى كانت غريبه قوى حتى السما كانت هاديه مفيش صوت أو مفيش نجوم أصل أنا تملى أسمع صوتهم وحتى القمر مش موجود تقريبا متغرب جوا حدوته عاشقين لانه كل يوم يسافر لاتنين بيحبوا بعض

"" امتى بقى يزورنى "" ما علينا محدش قال حاجه ،،،

فجأة لقيت نفسى ببكبى برغم إنى بقالى حوالى شهر وكام يوم مبكيتش لان مانعه دموعى من النزول والضعف لكن مش دايما الدموع ضعف ، هددتها كتير تهديد قوى بينى وبينها مش لازم أقول لكم عليه

لكن ساعات لما أحط القطرة كل يوم أستعبط وأبكى ،، الغريب ان دموعى كانت سخنه قوى ونازله بتجرى زى المسجون اللة ماصدق يخرج من سجنه وبيجرى ..

حسيت بصوت زى صوت حد ماشى قلت أخيرا الشارع اتكلم أقصد الجنازة خلصت ، بصيت الشارع ملقيتشى حد ،، أتارى القهوة فاارت ، حاجه غريبه والله بقالها ساعه على البوتاجاز وتفور بسرعه كده

رحت لها اشفاق لحالة الكانكه وخاصه لانى انا اللى منطفه المطبخ النهارده لقيت القهوة بتفور زى ماتكون بتقلد دموعى فضكت فنزلت من دمعه فى الماج فقلت أدوق بقى القهوة بالدموع دى مش بعمر خيرت بس

ده مزاج عالى جدا لقيتها عاديه حسيت بس بمرارة يمكن لان دموعى مرة لا حول لله دموعى عندها المرارة

دى مشكله لا لا أنا افتكرت انى مش حطيت سكر على القهوة ااه معلشى يادموعى ظلمتك

وبعدين حطيت اللبن على القهوة ف الماج الكبير الأبيض

ورحت قعدت عالمكتب جه دور مقطوعه "" يا قلبى ياغريب " يااه المقطوعه دى لما بسمعها بتوجعنى بحس ان عمر خيرت عمل قلبى بيانو وبيعزف عليه وبرغم انى بحب عزفه بس حركه البيانو بتوجع شويه تحت الأبجورا الحمرا دى حكايتها معايا حكاية الاأبجورا دى عندى من ثانويه عامه وأيام المذاكرة وعلمى الرياضه والدح والاستاتيكا والديناميكا ياااااه كانت أيام والله .... دنيا ياليت الشباب يعود يوما ً إنما بلا رياضه 2 لانها كانت رخمه شويه لا شويتن ...

بحاول أضحك عشان مكنش كئيبة عليكم

الحمد لله ان الليلادى عديت على خير عقبال العمر مايعدى بسرعه بقى ...