عندى حالة ملل ....

انا رحت الجامعه النهارده بعد فترة طويله جدا ، او زى ماتقولوا كده بعد تذوق تام لمعنى التخرج
مكنتش اعرف قبل مااخلص جامعه انى القعده ف البيت بالصعوبه دى ، وخاصه بالاحباط اللى انا فيه
كل صحابى بعيد ، أو انا اللى بعيد عنهم ـ، مش عارفه ليه الوحده بقت ساكنانى ، أنا عمرى ماكنت كده كنت تملى بجرى وبلعب وبضحك وبهزر ودايما بضحك ، والايام دى وخاصه من بعد ماكورسات الانجليش توقفت من قبل رمضان وانا حاسه بفراغ رهيب وملل قاتل ، متخيلتش ف يوم ان بعد مااخلص جامعه هيكون عندى فراغ
النهارده صحيت من النوم مخنوقه جدا وخاصة لان النت كان فاصل وده الحاجه الوحيده اللى بسمح لها تكون معايا ف وحدتى ، المهم صحيت رحت الجامعه واتصلت بتوته صاحبتى وبجد كانت وحشانى جدا
أول مااتصلت بيها وانا لسه بركب العربيه ف طريقى للجامعه يادوب برن فتحت عليا وقالت لى وحشتينى بصوت شجعنى انى اروح فعلا ، لكن مكنتش عارفه انا رايحه ليه ، قلت اروح وخلاص ويمكن أتغدى كشرى عند كشرى التحرير لان المحل ده حكايته معايا حكايه هبقى احكيها لكم ف بوست تانى ان شاء الله
المهم وانا ف طريقى للجامعه قولت دعاء السفر طبعا كالعاده وبعدين قريت صفحة من المصحف وبعدين حطيت الهيدفون الموبايل ف ودنى ونسيت نفسى بس كنت سامعه وراى ولد بيكلم بنت تقريبا لسه بيحبوا بعض جديد ابتسمت لهم ابتسامه خفيفه مرسومه كالعادة وشغلت الموبايل بصوت عالى جدا
وياسلام على أول ما سمعت تخيلوا ايه أغنية عندى حالة ملل بتاعه سميرة سعيد بتقول فيها إيه إيه أيه

إه افتكرت بتقول عندى حالة ملل

يسقط فيها الأمل

مش عارفه عايزه إيه

مش عارفه رايحه فين

محتاجه أشوف حاجه

تسعد قلبى الحزين

يمكن محتاجه لحب يهزنى

ويجينى من كل اتجاه

يمكن محتاجه لقلب يحسنى

ويرد كل مشاعرى للحياة

يااااااااااااااااااه الاغنيه دى بتوصف حالتى لكن فى حاجه ، أنا مش عايزه أحب لأن فى حاجه عرفتها مؤخرا ً المرأة إذا أحبت كثُرت أخطائها

وأنا مش عايزه أخطاء ، كفايه أخطائى فى الحياة العملية ، وعدم فهمى الكامل بالناس ، وأكبر خطأ إعتقادى إنى فاهمه فلان أو فلانه ده كويس وفى الآخر أطلع عبيطة ............ فعلا عبيطة

الله يمسيه بالخير اللى كان تملى يقولى ( إنتى عبيطة ولا إيه )

المهم ... وصلت الجامعه اتصلت بتوته عشان أشوفها فين وأنا رايحه لها شفت أصحابى اللى كانوا معايا ف الاتحاد ، ياااااااااااه والاتحاد ده كان له أيام روعه ، المهم أول مافاتن شافتنى قلتلى انتى متغيرة ليه لانها مشفتنيش من شهرين تقريبا ......الغريبه انى حاولت أدارى اكتئباى بالميك آب بس برضه كل اللى يشوفنى يقولى انتى متغيرة ليه .، برغم انى لابسه نظاره سوده وكبيرة جدا يعنى مغطيه معظم وشى تقريبا شبه نادية لطفى فىفالنظارة

المهم عدت مع فانت شويه لحد محاضرتها واحنا ماشين شفت واحده صاحبتى من زمان قوى كانت زميلتى ونزلت سنه واسمها أميرة معها بقى بنسى نفسى وبحكى كل قديمى وجديدى وبدون أى مونتاج بصراحه لما حكيت لها اترتحت شويه يمكن عشان هى بتمر بنفس حالتى وهى كمان فضفضت ليا كتير جدا

كنا جعانين رحنا جبنا شيبسى وكانز بس شيبسى عائلى طبعا لانى بموت فيه .... ده مش اعلانات ياجماعه

المهم .......... مش فاكره ايه الل حصل لكن هقوم أعمل فنجان قهوة وأرجع أكمل وخاصة لانى بسمع عمر خيرت وطبعا مينفعش من غير القهوة وثوانى وراجعه .....

باااااااااااااااك ... أنا جيت أكمل بقى يووووووووه برضه مش فاكره

على العموم أكيد هفتكر ان شاء الله وابقى أكمل لكم .

اه قبل ما أنسى أنا كتبت قصيده النهارده لما أظبطها هبقى أكتبها لكم .

وتانى هسيبكم وأرجع لوحدتى كالعادة .

وعندى حالة ملل ................

..... إلى آخره .